Bota
Beograd - Disa dhjetëra persona kanë protestuar sot në qytetin e Meroshinit në Serbi pasi kanë marrë vesh se 50 shqiptarëve të Kosovës u janë dhënë dokumenta si banorë të kësaj komune. Pas marrjes së pasaportave serbe, siç raporton agjencia e lajmeve BETA, të njëjtit janë bërë pjesë edhe e listës së votuesve në këtë komunë.
Bruksel - Inspektorët e Bashkimit Evropian kanë vlerësuar se një pjesë e madhe e kushteve për heqjen e vizave është përmbushur, por se ende duhet bërë kujdes me sigurimin e pavarësisë së gjyqësorit dhe përgjimin e rrjeteve kriminale.
Uashington - Sekretarja amerikane e Shtetit, Hillary Clinton, ka porositur të kihet kujdes nga dështimi i bisedimeve të sapofilluara ndërmjet Izraelit dhe Palestinezëve. Bisedimet mund të jenë për një kohë të gjatë shansi i vetëm për paqen në Lindjen e Mesme, tha Clinton në një intervistë të përbashkët të televizionit izraelit dhe palestinez.
Bruksel - Në Belgjikë gati tre muaj pas zgjedhjeve parlamentare kanë dështuar përpjekjet për krijimin e një qeverie të re. Kryetari i socialistëve frëngjishtfolës, Elio Di Rupo, i ngarkuar nga mbreti Alberti II për t'u përpjekur për krijimin e qeverisë së re, iu lut monarkut që ta lironte nga kjo detyrë. Alberti nuk e ka pranuar deri tani kërkesën.
Nacionalistët flamandë i kanë refuzuar deri tani propozimet e di Rupo-s për kapërcimin e grindjes për gjuhët, që po paralizon politikën.
Willington - Një tërmet i fuqishëm ka tronditur ishullin jugorë të Zelandës së re duke shkaktuar dëme të mëdha. Nuk njoftohet për të vdekur, ndërkohë që ka patur një numër të plagosurish. Në qytetin më të prekur Christchurch, është shpallur gjendja e jashtëzakonshme.
Amsterdam - Në Holandë kanë dështuar bisedimet për krijimin e qeverisë së pakicës së liberalëve të djathtë dhe kristiandemokratëve. Kundërshtari i fesë islame, populisti i djathtë Geert Wilders, i ndërpreu bisedimet për tolerimin e një kabineti të pakicës nga partia e tij. Ai reagoi në këtë mënyrë ndaj rritjes së rezistencës në radhët e kristiandemokratëve kundër aleancës me populistët e djathtë. Tre muaj pas zgjedhjeve parlamentare krijimi i qeverisë në Holandë është akoma çështje e hapur.
Minsk - Operatori i një faqeje interneti të opozitës në Bjellorusi është gjetur i vdekur. Kufoma e 36 vjeçarit Oleg Bebenin është gjetur në vilën e tij në afërsi të Minskut, njoftoi organizata e të drejtave të njeriut Charta 97. Arsyet e vdekjes janë të paqarta. Faqja e internetit të Bebeninit konsiderohet si zëdhënëse e opozitës bjelloruse kundër presidentit autoritar Alexander Lukaschenko.
Moskë - Bilanci i të vdekurve nga zjarret në Rusinë jugore ka shkuar në tetë. Zyrtarët e emergjencës thanë se 14 të tjerë janë hospitalizuar, ndërsa rreth 500 ndërtesa janë kapluar nga flakët në rajonin e Vollgogradit.
Më shumë se 50 njerëz vdiqën dhe mijëra mbetën të pastrehë në Rusi këtë verë nga zjarret dhe thatësira që përfshinë sipërfaqe të mëdha të Rusisë.
Bruksel - Kryediplomatja e Bashkimit Evropian, Ketrin Eshton, do të takohet të martën në Bruksel me presidentin e Serbisë, Boris Tadiq, njoftoi zëdhënësja e saj.
A do të kaloj rezoluta serbe në OKB?
(43 votes)
