Vjenë - Serbia dhe Bosnja po bëjnë luftë tregtare kundër Kosovës ka thënë Ministri i Ekonomisë së Kosovës, Ahmet Shala. Ai ka kërkuar nga BE dhe komuniteti ndërkombëtar në përgjithësi që të mos e toleroi bllokadën që këto dy shtete po i bëjnë produkteve kosovare.

Prishtinë - Kosova duhet dhe ka mundësi që t’i shpaguajë borxhet e vjetra të trashëguara nga koha e ish-Jugosllavisë, thonë ekspertë për çështje ekonomike. Sipas tyre, edhe Pakoja e Ahtisarit detyron që Kosova të paguajë borxhin e bartur nga Serbia.

Prishtinë - Ministri i Ministrisë së Administrimit të Pushtetit Lokal (MAPL), Sadri Ferati, ka vizituar sot Odën Ekonomike të Kosovës (OEK), ku është takuar me kryetarin e OEK, Safet Gërxhaliun. Gjatë takimit është diskutuar për mundësitë e thellimit të bashkëpunimit, me qëllim të krijimit të kushteve zhvillimin e biznesit. Dy palët janë dakorduar për krijimin e grupeve të përbashkëta profesionale, të cilat do ta hartojnë konceptin e veprimit të përbashkët.

Prishtinë - Sot në Ministrinë e Transportit dhe Postë-Telekomunikacionit u bë nënshkrimi i një memorandumi të mirëkuptimit midis Ministrisë së Transportit dhe Postë-Telekomunikacionit dhe Programit për ndërmarrje private të USAID-it për implementimin e pilot-projektit për rrugë dhe për themelimin e Qendrës për trajnimin e operatorëve të makinerive të rënda në infrastrukturën rrugore në Kosovë. Memorandumin, i cili i obligon bashkënënshkruesit për bashkëpunim të plotë në implementimin e këtyre projekteve, e nënshkruan ministri i MTPT, Fatmir Limaj, drejtori i Programit për ndërmarrje private të USAID-it, Mark Wood dhe drejtoresha e Misionit të USAID-it në Kosovë, Patricia Rader.