Prishtinë - Sot filloi viti i ri shkollor në shumicën e shkollave fillore dhe të mesme të Kosovës. Ministria e Arsimit, Shkencës dhe Teknologjisë thotë se në pjesën më të madhe të shkollave janë bërë të gjitha përgatitjet e nevojshme teknike e organizative për fillim të mbarë të vitit të ri shkollor. Por, drejtoritë komunale të arsimit bëjnë të ditur se në disa shkolla nuk kanë përfunduar renovimet dhe përgatitjet tjera teknike, prandaj viti i ri shkollor do të fillojë me vonesë.

Prishtinë - Presidenti i Kosovës, Fatmir Sejdiu i dorëzoi sot zonjës Nexhmije Pagarusha çmimin “Artiste e Merituar”, me të cilën e ka dekoruar kohë më parë. Me këtë rast, Presidenti Sejdiu tha se dekorimi i zonjës Pagarusha është një vlerësim për veprën kulminante në fushën e artit, në fushën e muzikës shqiptare dhe në fushën e një artisteje, e cila diti në mënyrën më të mirë të jetë shprehje e identitetit dhe e vlerave të një populli, në këtë rast e muzikës shqiptare, në gjithë repertorin e saj të begatë dhe të pafund.

Prishtinë - Shumë fëmijë do të jenë të privuar nga kënaqësia e shijimit të 1 shtatorit, për shkak se MASHT nuk ka krijuar kushte për fillimin e vitit të ri shkollor për të gjithë nxënësit. Shumë shkolla janë duke u rropatur ende për përgatitjen e lokaleve shkollore të cilat nuk do të mund të bëhen gati me 1 shtator. Asnjë arsyetim i zyrtarëve arsimor, për vonesat e tilla, nuk ka si të kuptohet ndryshe, përveç si dështim i zbatimit të politikave të MASHT-it. Kështu tha sot Jonuz Salihaj, kryesues i Komisionit për arsim në AAK, gjatë një konference për media.

Prishtinë - Ministria e Arsimit, Shkencës dhe Teknologjisë e ka emëruar sot profesorin gjerman Ronald Moench rektor themelues të Universitetit të Prizrenit. Ministri Enver Hoxhaj ka thënë se studimet në këtë universitet do të fillojnë më 1 tetor, ndërsa rektori themelues do të kujdeset për punësimin e stafit të nevojshëm për fillimin e procesit mësimor.