Istog - Zëvendësministri i Ministrisë së Forcës së Sigurisë së Kosovës, Vladimir Todoroviq, bëri vizitën e tij të parë në fshatin Dragolevc të Komunës së Istogut. Në këtë vizitë zëvendësministri ishte i shoqëruar edhe nga Zyra për Komunitete dhe Departamenti për Bashkëpunim Civilo – Ushtarak të MFSK-së. Në këtë fshat Forca e Sigurisë së Kosovës është e përfshirë në projektin e zhvillimit të infrastrukturës dhe ofron ndihmën mjekësore familjeve serbe që janë kthyer në fshatë, i cili ka qenë i shkatërruar gjatë luftës.
Zëvendësministri është takuar me të kthyerit, Përfaqësuesit e Zyrës së Komuniteteve të Komunës së Istogut, si dhe me përfaqësuesit e UNHCR-it dhe KFOR-it, të cilët janë të përfshire në projekt.
Gjatë takimit, të kthyerit serb dhe përfaqësuesit e komunës, shprehen mirënjohjen e tyre lidhur me bashkëpunimin e mirë dhe përkrahjen që po jep FSK-ja, në sigurimin e kushteve të qëndrueshme të jetesës së të kthyerve. Ata veçanërisht falënderuan FSK-në për punën e tyre efektive që e kanë bërë në bashkëpunim me KFOR-in për pastrimin e fshatit në kohë shumë të shkurtër. Tani është e mundur të ndërtohen shtëpi të reja dhe të kthehen familjet.
Në pranverën e hershme projekti në fshatin Dragolevc, nisi me qellim të mbështetjes së familjeve serbe, të cilat dëshirojnë të kthehen në shtëpitë e tyre. FSK-ja është e angazhuar në bashkëpunim të ngushtë me komunën, KFOR-in dhe organizatat e tjera të përfshira në projektin e kthimit të qëndrueshëm. Është planifikuar të ndërtohen 13 shtëpi deri në fund të vitit, për të siguruar mundësinë e të kthyerve që të sjellin familjet e tyre në fshat. Përfshirja e FSK-së në këtë projekt është një hap i rëndësishëm për misionin e FSK-së për të ndërtuar besimin dhe zhvillimin e bashkëpunimin në mes të komuniteteve të Kosovës.
0 Koment-e 
