Klinë - Sot në qytetin e Klinës është bërë përurimi i Qendrës së Regjistrimit të Automjeteve (QRA) dhe Qendrës Komunale të Regjistrimit Civil (QKRC), projekte këto të financuara nga Ministria e Punëve të Brendshme. Ministri i MPB-së, Bajram Rexhepi tha me këtë rast se inaugurimi i këtyre dy qendrave është në vazhdën e krijimit të kushteve më të mira për qytetarët e që janë shërbime tepër të rëndësishme edhe për çështjen e liberalizimit të vizave.
“Kjo do të krijojë mundësinë që në kohën që e kemi paraparë deri në dhjetor, ta përfundojmë edhe regjistrin civil që është edhe parakusht për pasaportat biometrike, që i hapë rrugë liberalizimit të vizave për Kosovën”, tha ministri Rexhepi.
Ndërkaq, kryetari i Klinës, Sokol Bashota, i cili po ashtu mori pjesë në këtë ceremoni inauguruese, tha se tashmë QRA dhe QKRC do të jenë në shërbim të qytetarëve dhe do t’u ofrojnë kushte më komode stafit punonjës.
Kostoja e këtyre dy qendrave i ka kushtuar MPB-së 270 mijë euro.
0 Koment-e 
