JOVANOVIÇ KUNDËR BOJKOTIT TË ZGJEDHJEVE LOKALE NË KOSOVË NGA ANA E SERBËVE
BEOGRAD, 3 korrik /Kosovanews/- Kryetari i Partisë Liberale Demokratike (PLD) Çedomir Jovanoviq ka deklaruar se Qeveria e Serbisë nuk duhet t\'u bëjë thirrje serbëve që t\'i bojkotojnë zgjedhjet lokale në Kosovë, sepse në këtë mënyrë po i shtyn në izolim. Jovanoviq ka theksuar se bojkotet e deritanishme të zgjedhjeve vetëm sa i kanë shtyrë serbët në geto dhe kanë humbur rastin që të luftojnë për status të komunitetit të organizuar politik që në institucione të shfrytëzojë të drejtat e veta. “Thirrja për bojkot vetëm i forcon ekstremistët, të cilët fatin e serbëve të Kosovës e përdorin si pretekst për vazhdimin e politikës së izolacionizmit, i cili minon Serbinë ndërsa i çon në greminë bashkëkombësit vet, mu sikur gjatë viteve nëntëdhjetë”, ka theksuar Jovanoviq, lider i Partisë Liberale Demokratike, e cila e vetmja është shprehur kundër thirrjes së qeverisë serbe për bojkotimin e zgjedhjeve lokale në Kosovë.
